اردوئے معلیٰ

Search

پیکرِ حق و صداقت ، لائقِ صد احترام

دین کے اوّل خلیفہؓ ، عاشقِ خیر الانام

 

پیکرِ صبر و تحمّل ، با مروّت ، با وقار

خوب صورت ، نیک سیرت ، نیک خو اور نیک نام

 

جس سے ایوانِ صداقت میں ہے پھیلی روشنی

آسمانِ صدق کے ہیں آپ وہ ماہِ تمام

 

شاہِ دیں کے معتمد ، کارِ نبوت کے مشیر

یارِ غارِ مصطفیٰ کا کتنا اونچا ہے مقام

 

اہلِ ایماں پر کرم کے پھول برساتے رہے

مرتدوں کے حق میں ٹھہرے آپ تیغِ بے نیام

 

اصلیت کا ہو بہو چہرہ نظر آنے لگا

کس قدر شفاف تھا ان کی خلافت کا نظام

 

سارے اصحابِ نبی تعظیم کرتے آپ کی

حیدرؓ و فاروقؓ و عثماںؓ آپ کو مانیں امام

 

نائبِ شاہِ مدینہ ، پیکرِ صبر و رضا

تیرا اشرف تیری عظمت کو کرے جھک کر سلام

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ