کربِ درونِ ذات کا بھی اندمال سوچ
مقصودؔ ! عجزِ حرف سے نعتِ کمال سوچ
وہ بارگاہ اور بیاں کی یہ بے بسی
لفظوں سے ماورا کوئی اظہارِ حال سوچ
اُس سے کرم بھی مانگ ، خُدائے کرم بھی مانگ
جیسی کریم ذات ہے ویسا سوال سوچ
وہ دید یاب تیرہ برس ، وہ زمانِ خیر
شہرِ کرم نواز کے وہ ماہ و سال سوچ
پیشِ حضور شورِ تنفس ہے ناروا
شورِ نیاز و گریۂ دل کو سنبھال سوچ
شایانِ نعتِ سرورِ عالَم سخن محال
بس حسرتِ ثنا کا ہی کوئی خیال سوچ
حرفوں کے ربط و ضبط سے کب نعت ہو سکے
چاہے ہزار رنگ میں یہ اتصال سوچ
اُس منبعِ جمال پہ پیہم درود پڑھ
اُس پیکرِ کمال کو بس لایزال سوچ
جذب و شعور ہی نہیں کافی برائے نعت
مقصودؔ ماورائے حدِ حال و قال سوچ
