اردوئے معلیٰ

Search

کرم پرور ، عطا یاور ! فدا تم پر ابی ، اُمی

جہانِ خیر کے مصدر ! فدا تم پر ابی ، اُمی

 

بصد حیرت فراواں ہے ، بصد فرحت نمایاں ہے

عطائے نعت کا منظر ، فدا تم پر ابی ، اُمی

 

تمہارے خیر یابندہ غنی شاہانِ عالَم سے

تمہارا لطف جاں پروَر ، فدا تم پر ابی ، اُمی

 

تمہی مالک ، تمہی مولا ، تمہی قاسم ، تمہی آقا

تمہی سید ، تمہی سرور ، فدا تم پر ابی ، اُمی

 

جمالِ ذات کے مطلع ، جلالِ ذات کے مرجع

کمالِ ذات کے مظہر ! فدا تم پر ابی ، اُمی

 

تمہارا ذکر تاباں ہے ، تمہارا نام رخشاں ہے

’’ رفَعنا ‘‘ کی منازل پر ، فدا تم پر ابی ، اُمی

 

تماثُل بے تاثُر ہے ، تقابُل بے تعقل ہے

کہ تم بے مثل ہو سروَر ، فدا تم پر ابی ، اُمی

 

نشانِ سطوتِ دُنیا ، جہانِ عظمتِ عقبیٰ

تمہارا جادۂ انور فدا تم پر ابی ، اُمی

 

نگوں ہے خامۂ مقصودؔ کوئے مدحِ عالی میں

لکھے مدحت تری کیوں کر فدا تم پر ابی ، اُمی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ