اردوئے معلیٰ

Search

کسی اور کے خدا سے نہ غرض نہ واسطہ ہے

ہے وہی خدا ہمارا جو حضور کا خدا ہے

 

یہ جو بزمِ آب و گِل ہے یہ تمام کربلا ہے

جہاں امن و آشتی ہے وہ دیارِ مصطفیٰ ہے

 

یہ جو آدمی کا رتبہ ہے بلند قدسیوں سے

کسی اور کا نہیں ہے یہ کرم حضور کا ہے

 

مہ و آفتاب کیا ہیں تری گردِ رہگزر ہیں

وہی راستہ ہے روشن جہاں تیرا نقش پا ہے

 

جسے مصطفیٰ نے روشن کی ظلمتِ حرا میں

سرِ بزمِ علم و دانش وہ چراغ جل رہا ہے

 

کوئی اس کی عظمتوں کو نہ سراغ پا سکے گا

وہ نعال پا ہے اس کی جسے عرش چومتا ہے

 

کسی اور راستے سے نہ ملے گی ہم کو منزل

جو حضور نے بتایا وہی ٹھیک راستہ ہے

 

مری بات کی گواہی ہے اذان اور کلمہ

جہاں ذکر ہے خدا کا وہیں ذکرِ مصطفیٰ ہے

 

مجھے ناز بخت پر ہے مجھے فخر ہے یہ اعجاز

کہ مرا نبی وہی ہے جو امام الانبیاء ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ