اردوئے معلیٰ

کمالِ جستجو تُو ہے، جمالِ آرزو تُو ہے

گماں سے ماورا ہو کے، یقیں کے روبرو تُو ہے

 

تری مدحت ہی رکھتی ہے حصارِ یاس سے باہَر

مرے احساس کا تو معنیٔ لاَ تَقْنَطُوا تُو ہے

 

بہ موجِ تلخ خنداں ہُوں، بہ اوجِ کرب فرحاں ہُوں

بہ ہر سُو خیر ہے آقا کہ میرا خیر جُو تُو ہے

 

بہار آسا تری مدحت، ضیا پرور تری باتیں

طراوت زاد لمحوں میں خیالِ مُشکبُو تُو ہے

 

جو سانسوں میں مہکتا ہے، وہ تیرا اسمِ جاں پرور

رگِ جاں میں جو بہتی ہے وہ نازِ آبجُو تُو ہے

 

مرے خوابوں کو زندہ رکھ، مری راتوں کو طلعت دے

پسِ تدبیرِ طلعت بھی تو میرا ماہ رُو تُو ہے

 

بہ فیضِ اِسم قائم ہیں جہانِ اخضر و احمر

چمن آثار منظر تُو، گُلوں میں رنگ و بُو تُو ہے

 

تری نسبت نے بخشی ہے دُعا میں لذتِ پیہم

فصیلِ حرفِ مدحت پر فروزاں چار سُو تُو ہے

 

دِکھا دے گنبدِ خضریٰ، عطا مقصودِؔ ہستی کر

مرے بے کیف لمحوں میں تمنائے نمو تُو ہے

 

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ

اردوئے معلیٰ

پر

خوش آمدید!

گوشے۔۔۔

حالیہ اشاعتیں

اشتہارات

اشتہارات