کون پانی کو اڑاتا ہے ہوا کے دوش پر​

کون پانی کو اڑاتا ہے ہوا کے دوش پر​

کس نے بخشی پیڑ کو آتش پذیری سوچئے​

 

کس کے لطفِ خاص سے نغمہ فشاں ہے سانس کی​

دھیمی دھیمی، دھیری دھیری یہ نفیری سوچئے​

 

کس کی شانِ کُن فکاں سے پھوٹتا ہے خاک سے​

یہ گیاہِ سبز کا فرشِ حریری سوچئے​

 

کون دیتا ہے جوانی میں لہو کو حِدّتیں​

کون کردیتا ہے عاجز وقتِ پیری سوچئے​

 

ہر دلِ بےمِہر پر مُہریں لگادیتا ہے کون​

کون کرتا ہے عطا روشن ضمیری سوچئے​

 

بجلیوں کو کون سی سرکار سے صادر ہوا​

ابر کے زنداں کا فرمانِ اسیری سوچئے​

 

دلق پوشوں، خانہ بردوشوں کو کس نے سونپ دی​

جاہِ فغفوری، کلاہِ اَردشیری سوچئے​

 

وادیِ بطحا میں اک اُمّی پیمبر بھیج کر​

کس نے کی انسانیت کی دستگیری سوچئے​