اردوئے معلیٰ

Search

کون کہتا ہے مجھے شان سکندر دے دے

میرے معبود مجھے فقر ابو ذرؑ دے دے

 

مالک لوح و قلم، بہر جہاد قلمی

مجھ کو الفاظ و مفاہیم کا لشکر دے دے

 

عشق جو تو نے اویس قرنیؑ کو بخشا

ہو جو ممکن تو مجھے اس سے فزوں تر دے دے

 

تاجور بھی میرے قدموں میں سعادت ڈھونڈیں

زینت سر کو جو نعلین پیمبر دے دے

 

جن کو سرکار نے بخشا شرف گویائی

لعل و یاقوت نہ دے، مجھ کو وہ کنکر دے دے

 

تیرے محبوب نے جو پیٹ پے باندھا اکثر

وسعت رزق نہ دے، مجھ کو وہ پتھر دے دے

 

ظاہری تن کے لئے اور نہ کفن کو کپڑا

جو میرے عیب چھپا دے وہی چادر دے دے

 

وقت کے مرحب و عنتر سے نمٹنے کے لئے

پھر کوئی فاتح خيبرؑ سا غضنفر دے دے

 

اور سبط جعفرؔ کی تو بخشش کو یہی کافی ہے

…کہ غلامی در آل پیمبر دے دے

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ