اردوئے معلیٰ

Search

کیہ اڈول پیر چکیا مِرے کولوں اکھ بچا کے

ترے شہر جا کھلوتی مِری سوچ لک لکا کے

 

کدی زلف دا ہلارا کدی سوہنا بلارا

دو جہان لٹ گئے نیں ترے ناز مِل ملا کے

 

کدی وِلچدے نہ میتھوں میں وِلا وِلا کے تھکیاں

تری بس ریاڑ کردے مِرے نین ول ولا کے

 

جدوں بھیک ناہیں ملدی نہ کِتے وی دال گلدی

جا مدینے ساہ کڈھیندا مِرا چین گھم گھما کے

 

کدی عشق دا کٹولہ کدی شوق دا مصلّہ

مِرے ذوق نوں لے جاون ترے شہر ول اُڈا کے

 

ترے جوڑیاں نوں لگے کِتے دھوڑ نہ نظر دی

ترے کول اکھ نہ آوے ترے کول کول آ کے

 

تری لاہم دی ہے اعجازؔ جدوں واء مکھ وکھاندی

مِرے دل دا رکھ سلامی کرے ہتھ ہلا ہلا کے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ