اردوئے معلیٰ

Search

گدا کو دید کا شربت پلا دو یا رسول اللہ

اسے خوابوں ہی میں جلوہ دکھا دو یا رسول اللہ

 

تمھارے ہجر میں بیمار ہونا جب عبادت ہے

تو میں کیوں کر کہوں مجھکو شفا دو یا رسول اللہ

 

یہی دل کی تمنا ہے یہی لب کا ترانہ ہے

گدا کو اپنے قدموں میں جگہ دو یا رسول اللہ

 

خطا کاروں کی یہ بھی التجا ہے نور سے اپنے

اندھیرا قبر کا سارا مٹا دو یا رسول اللہ

 

زبانیں سوکھ جائیں گرمئ خورشید سے جس پل

مئے کوثر گداؤں کو پِلا دو یا رسول اللہ

 

جہاں سے ہر گھڑی دیدار ہو بس آپ کا ہم کو

خدارا ! خلد میں ایسی جگہ دو یا رسول اللہ

 

جو سر پر عاصیوں کے ہر گھڑی دنیا میں رہتا ہے

وہی سایہ ہمیں روزِ جزا دو یا رسول اللہ

 

کہ جس کے سامنے سب ہیچ ہیں دنیا کی خوشبوئیں

پسینہ وہ تبسم کو سنگھا دو یا رسول اللہ

 

تبسم چاک دل اپنا قمر کی مثل کر دیگا

محبت سے فقط انگلی ہلا دو یا رسول اللہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ