اردوئے معلیٰ

Search

گونجتا تھا کوئی خلا اس میں

کاش کوئی تو جھانکتا اس میں

 

وہ جنوں اور کس کے سر جاتا

میں نے ہونا تھا مبتلا اس میں

 

ایک پاتال تھا تعاقب میں

میں کہ اک روز گر گیا اس میں

 

وہ برستا رہا بہت مجھ پر

میں بہت بھیگتا رہا اس میں

 

میری ہستی میں ایک جنگل تھا

میں بہت مطمئن رہا اس میں

 

تم فقط زندگی کو روتے ہو

میرا کچھ اور بھی تو تھا اس میں

 

وہ جو اک شخص آج کل میں ہوں

میں کہیں بھی نہیں بچا اس میں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ