اردوئے معلیٰ

Search

گویا بڑی عطا ہے طلبگار کے لئے

یہ قصدِ نعت گوئی گنہگار کے لئے

 

پڑھتی ہے اس پہ سانس کی مکڑی درودِ پاک

یہ غارِ دل ہے جلوہءِ سرکار کے لئے

 

مقصود کُن بھی اس کے سوا اور کچھ نہیں

دونوں جہاں ہیں ھستیء سرکار کے لئے

 

بزمِ نبی میں مدح سَرا ہوں سو لفظ لفظ

لب پر بصَد نیاز ہے اظہار کے لئے

 

سَر کو جھکا کے سایہءِ گنبد میں بیٹھنا

اک یہ دوا ہے عشق کے بیمار کے لئے

 

اک جاوداں بہار ہے ہستی حضور کی

اس ساری کائنات کے گلزار کے لئے

 

ہے اتّباعِ سیرتِ احمد میں ہی نجات

ورنہ ہے ناؤ آفتِ منجدھار کے لئے

 

ملتی ہے دیر تک اسے دربار میں جگہ

اعزاز ہے یہ سایہء دیوار کے لئے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ