گِھر گِھر آئے پگلے بادل ، برسی میگھا سانوری
گائے پپیہا ، ناچے پُروا ، کُوکے کوئل بانوری
میں بِرہا کی ماری ناری سپنے دیکھوں پریت کے
کجرا رے نینوں میں دمکیں تیور گھبرو مِیت کے
!بستی بستی پیٹ ڈھنڈورا، او ری سکھی من موہنی
کرشن پیا کی دُوری سے اَدھ موئی ہے رادھا سوہنی
موہے ساجن! مانگ میں جب سیندور نہیں ترے نام کا
چھاپ، تِلک، پائل،، نتھلی، چُوڑی، کنگنا کِس کام کا
جھونکے لائی دُور سے ساجن کی مہکار کے
بھینی رُت میں ڈوب کے بُھولی میں سب دُکھ سنسار کے
کیسریا چُنری رنگوائی ، انگ بھگوئے لال میں
لال گلاب پیا کے من کو بھا جاوے ہر حال میں
شیتل جَل دو گھونٹ پلا دے ، برکھا! تیری خیر ہو
پلکیں موند کے نیند کروں تو پیا نگر کی سیر ہو
