اردوئے معلیٰ

Search

ھمارے اجداد نے کہا تھا کہ بُت پرستی نہیں کریں گے

مگر ھمیں ایسا بُت مِلا ھے کہ بے وقوفی نہیں کریں گے

 

مزارِ غالب کی ساری اینٹوں سے اِس قدر ھے ھمیں عقیدت

کہ جنگ چِھڑ بھی گئی تو دِلّی پہ گولہ باری نہیں کریں گے

 

اگر حکومت تُمہاری تصویر چھاپ دے نوٹ پر، مِری دوست

تو دیکھنا تُم کہ لوگ بالکل فضول خرچی نہیں کریں گے

 

ھمارے سالار کو بھی فرماں روائی کا شوق ھے، لہٰذا

ھم اصل حقدار شاھزادے کی تاج پوشی نہیں کریں گے

 

ھمارے چند اچھے دوستوں نے یہ وعدہ خود سے کیا ھوا ھے

کہ شکل اللّہ نے اچھی دی ھے سو بات اچھی نہیں کریں گے

 

دکھا کے آیا ھوں اپنے یاروں کو اپنے بٹوے میں تیری تصویر

سو آج کے بعد تیری آنکھوں میں تانکا جھانکی نہیں کریں گے

 

تُو شاھزادی سہی مگر ھم غریب پکّے ھیں اپنی دُھن کے

اگرچہ کچّے گھروں سے آئے ھیں، بات کچّی نہیں کریں گے

 

ھم ایسے شدّت پسند لوگوں کو مت محبت کا مشورہ دو

ھمیں خبر ھے کہ جب محبت کریں گے، تھوڑی نہیں کریں گے

 

عجیب مَے کش ھیں، خوب پی کر یہ روز کرتے ھیں خود سے وعدہ

کہ آج گر بچ گئے تو کل سے شراب نوشی نہیں کریں گے

 

جنہوں نے اُس سانولی کے نمکین خال و خد کو چکھا ھے فارس

نمک کی حُرمت کو جانتے ھیں، نمک حرامی نہیں کریں گے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ