اردوئے معلیٰ

Search

ہر ایک سورۂ قرآں سنائے بسم اللہ

سبھی نے پہنی ہوئی ہے قبائے بسم اللہ

 

مریضِ غربت و افلاس کے لئے اکثر

حضور دیتے رہے ہیں دوائے بسم اللہ

 

قدومِ سرورِ عالم میں سر بہ خم ہو لوں

میں پھر قضا سے کہوں گا کہ آئے بسم اللہ

 

لحد میں قلب و نظر فرشِ راہ کر دوں گا

زباں سے کچھ نہ کہوں گا سوائے بسم اللہ

 

غموں کی دھوپ میں بیکا نہ ہوگا بال مرا

کہ سر پہ سایہ فگن ہے ردائے بسم اللہ

 

میں چاہتا تھا کروں مدحتِ حبیبِ خدا

دیارِ غیب سے آئی صدائے بسم اللہ

 

جو چاہے رزقِ سخن میں نزولِ برکت ہو

پڑھے وہ نعت سے پہلے دعائے بسم اللہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ