اردوئے معلیٰ

Search

ہر شعر میں عیاں ہے محبت حضور کی

جب سے ہوئی ہے چشمِ عنایت حضور کی

 

ہر دور پر محیط رسالت حضور کی

ہر دور کا نصاب ہے سیرت حضور کی

 

نبیوں کے پیشوا کی غلامی نصیب ہے

نازاں ہے اپنے بخت پہ امت حضور کی

 

دستِ طلب کو دستِ کونین بخش دے

دنیا میں بے مثال سخاوت حضور کی

 

کتنے ہی لوگ یوں تو ہوئے ہیں وطن سے دور

عالم میں انتخاب ہے ہجرت حضور کی

 

ہر شب یہی دعا مرے لب پر سجی رہے

ہو خواب میں نصیب زیارت حضور کی

 

دن رات آ رہی ہے فلک سے یہی صدا

احسان ہے زمین پہ بعثت حضور کی

 

ہو عرصۂ حیات کہ میدانِ حشر ہو

انسان کو رہے گی ضرورت حضور کی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ