اردوئے معلیٰ

Search

ہم تو کرتے ہیں ثنا از پئے تحصیلِ کمال

غیرِ خالق سے وگرنہ ہے تری نعت محال

 

نطقِ ہر ناطقہ کا حسن ہے نطقِ یوحٰی

جملہ جملوں کا تجمل تِرے جملوں کا جمال

 

وجہ تزئینِ تکلّم تری صورت کا بیان

فخرِ الفاظ و معانی تری سیرت کی مقال

 

کیسے گلہائے جناں ہوں ترے لب کی مانند ؟

آئنہ کب ہے بھلا تیری جبیں کی تمثال ؟

 

شاخِ طوبٰی ہو کہاں ہمسرِ بازوئے حضور ؟

چشمۂِ دستِ سخا کی نہیں تسنیم مثال

 

تاکہ پھر میری توقع سے زیادہ مل جائے

ان کو کرتا ہوں ثواب اپنا میں سارا ایصال

 

کنزِ تمدیح معظمؔ ہے میسر جن کو

گردشِ وقت سے کیسے ہوں بھلا وہ کنگال

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ