اردوئے معلیٰ

Search

ہونٹوں پہ سجایا ہے درودوں کا لبادہ

رکھتے ہیں مدینے میں حضوری کا ارادہ

 

ہم جیسے گداؤں کے لئے کوئے جناں میں

در سرورِ کونین کا رہتا ہے کشادہ

 

وہ رفرف و براق نشیں صاحبِ عالم

ہم مفلس و نادار غریب اور پیادہ

 

کیا پیش کروں کچھ بھی نہیں آپ کے لائق

توصیف کے کچھ حرف ہیں بے مایہ و سادہ

 

ہم حشر کے دن ڈھونڈنے والوں کو ملیں گے

دل اور جبیں شاہ کی چوکھٹ پہ نہادہ

 

روتے تھے تواتر سے تہجد میں، حرا میں

مقصد تھا فقط امتِ عاصی کو افادہ

 

ہم لائقِ دیدارِ محمد نہیں لیکن

اشفاق ہمیں رہتی ہے امید زیادہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ