اردوئے معلیٰ

Search

ہو گئے راکھ سبھی خواب شہابی تیرے

ہاتھ کیا آیا بجز خانہ خرابی تیرے

 

وقت مصروفِ ترامیم رہا اور ادھر

زرد پڑتے گئے رخسار گلابی تیرے

 

ہم کہ جاں دادہِ یک نانِ جویں تھے ائے دل

ہائے کم بخت مگر شوق نوابی تیرے

 

دست کش، جا ، کہ نہیں آج کوئی دستِ طلب

مر گئے پیاس کی شدت سے شرابی تیرے

 

عشق آنکھوں کی نمی چوس کے دم لیتا ہے

خاک ہو جائیں گے یہ کرہِ آبی تیرے

 

لمس کا باب کہ بس تشنہ تحریر رہا

لاکھ چہرے تھے شبِ وصل کتابی تیرے

 

خودکشی ٹھان کے ہتھیار اٹھائے تھے یہاں

روکنے تھے ہی نہیں وار جوابی تیرے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ