اردوئے معلیٰ

Search

ہے بہ فضلِ حق مرا خیرالبشر سے رابطہ

روزِ اوّل سے ہے قائم اُن کے در سے رابطہ

 

ہے نظارہ ہائے طیبہ کا نظر سے رابطہ

خوب مستحکم ہے سنگ در کا سر سے رابطہ

 

اُن کی چوکھٹ کی گدائی پہ فدا ہے خسروی

ہے بحمدِاللہ شاہِ بحر و بر سے رابطہ

 

بارشِ انوار ہوتی ہے جہاں آٹھوں پہر

ہر نفس رہتا ہے میرا اُس نگر سے رابطہ

 

بھیجتا ہوں آپ کی ذاتِ مقدس پر درود

کیوں نہ ہو میری دُعاؤں کا اثر سے رابطہ

 

منزلِ مقصود خود کرتی ہے اُس کی جستجو

جس کا ہو جاتا ہے اُن کی رہگزر سے رابطہ

 

رابطہ قائم جو کر لیتے ہیں شہرِ علم سے

اُن کا ہو جاتا ہے پھر علم و ہنر سے رابطہ

 

معجزے شمس و قمر کے یہ گواہی دے گئے

مصطفیٰ کا خوب ہے شمس و قمر سے رابطہ

 

بس وہی ٹھہرا جہاں میں صاحبِ عزّ و وقار

جس نے رکھا اُن کی ذاتِ معتبر سے رابطہ

 

جو ہمیں لے جائے خاکیؔ اُس دیارِ نور تک

صرف رکھنا چاہیے اُس ہمسفر سے رابطہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ