اردوئے معلیٰ

Search

ہے دل کی حسرت ہر ایک لمحے میں مدحِ خیر الانام لکھوں

ادب سے چوموں قلم کو پہلے ، درود لکھوں سلام لکھوں

 

اسی میں گزرے حیات میری ، یہی سہارا ہو زندگی کا

کتابِ ہستی کے ہر ورق پر میں پیارے آقا کا نام لکھوں

 

ثنا نگاری بھی اوج پر ہو، بیاں کروں آپ کی میں سیرت

کہ جس میں حسّان کی مہک ہو، کوئی تو ایسا کلام لکھوں

 

کرم ہو میرے کریم کا توعطا ہو رزقِ سخن کی دولت

قصیدہ ان کا ولا کی خوشبو میں گوندھ کر صبح و شام لکھوں

 

اشارہ کر دیں قمر کو توڑیں ، وہ ڈوبے سورج کو چاہیں موڑیں

وہ پتھروں کو پڑھائیں کلمہ ، یہ معجزے بھی تمام لکھوں

 

بڑھائی خالق نے شان ان کی ، وہ شافعِ امّتاں ہوئے ہیں

نبی ہیں سب ان کی اقتدا میں ، اُنہیں میں سب کا امام لکھوں

 

بلا لیں گر ناز کو مدینے تو ایک ہی التجا ہے میری

وہیں پہ بن جائے میرا مدفن، وہیں ہو میرا قیام لکھوں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ