اردوئے معلیٰ

Search

ہے مشکل میں تیری یہ مخلوق ساری خدایا کرم کر خدایا کرم کر

ہمیں اس وبا سے ملے رستگاری خدایا کرم کر خدایا کرم کر

 

یہ گاڑے ہیں پنجے مرض نے جو ہر سو مرض میں اضافہ ہوا جا رہا ہے

ہر اک پر ہوا ہے عجب خوف طاری خدایا کرم کر خدایا کرم کر

 

بہائے ہیں جس کے لئے اشک غاروں میں جا کر نبی نے کہ تو مان جائے

یہ تیرے پیمبر کی اُمّت ہے پیاری خدایا کرم کر خدایا کرم کر

 

ترِی بارگہ میں یہ بندے الٰہی گناہوں بھرے ہاتھ کیسے اٹھائیں

کہ خالی ہیں دامن ، عمل سے ہیں عاری خدایا کرم کر خدایا کرم کر

 

پھنسے ہیں الٰہی تِرے در سے پھر کر ، یہ در در کی ٹھوکر بنی ہے مقدر

یہ سر پر گناہوں کی گٹھڑی ہے بھاری خدایا کرم کر خدایا کرم کر

 

دعا ہر گھڑی ہے یہ اپنی زباں پر کہ پُختہ رہے بندگی کا تعلق

دمِ آخریں بھی رہے استواری خدایا کرم کر خدایا کرم کر

 

جلیلِ گنہ گار نادم ہے مولا ترِا جو کرم ہو ٹلے یہ تباہی

کرم کر دے مخلوق پر ذاتِ باری خدایا کرم کر خدایا کرم کر

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ