اردوئے معلیٰ

Search

یار کی دستک پہ بھی تُو نے یہ پُوچھا: کون ھے ؟

خُود کو عاشق ماننے والا تُو ھوتا کون ھے ؟

 

اتنا پیارا ھے کہ اُس کے جُھوٹ پر بھی چُپ ھیں لوگ

ورنہ سب اُس شخص سے واقف ھیں، بچّہ کون ھے

 

میری غزلیں سُن رھے ھیں تاکہ تیرے خواب آئیں

مجھ کو سُننے والے سب تیرے ھیں، میرا کون ھے

 

آ گلے لگ جا مِرے، اے جان لیوا زندگی

تیرے جیسا پیارا قاتل ھو تو ڈرتا کون ھے ؟

 

مَیں نے امروھہ کی گلیوں کو سُنائی جب غزل

جُھوم کر جَون ایلیا بولے: یہ لڑکا کون ھے ؟

 

کس سے مل کر تیرا چہرہ پُھول جیسا کِھل اُٹھا ؟

شہر کے سب باسیوں میں اتنا تازہ کون ھے ؟

 

گُھومتا پِھرتا تھا مَیں اُس کی گلی میں رات دن

پھر کسی سے اُس نے پوچھا: یہ بگُولا کون ھے ؟

 

زندگی میں باتیں کرلو اپنے پیاروں سے سبھی

بعد میں قبریں جو چیخیں بھی تو سُنتا کون ھے ؟

 

رب نے ھر انسان کا جوڑا بنایا ھے اگر

ڈھونڈ کر بتلاؤ، یارو ! میرے والا کون ھے ؟

 

آگ کی آنکھوں میں آنکھیں ڈال کر بیٹھا ھُوں مَیں

دیکھنا یہ ھے کہ اب پہلے جھپکتا کون ھے

 

شُکر ھے مَیں نیند میں بولا نہ تیرا اصل نام

جب جگا کر یاروں نے پوچھا کہ گڑیا کون ھے ؟

 

سوچتا ھُوں دوستوں کی بے نیازی دیکھ کر

ان گنت اپنوں بھری دُنیا میں اپنا کون ھے ؟

 

بس طوائف پر ھے کیوں تُجھ کو گُماں شیطان کا ؟

تُجھ سمیت اِس بالاخانے میں فرشتہ کون ھے ؟

 

خود کشی پر شعر کہنا تو نہیں ھے خود کشی

بات ثروت کی سبھی کرتے ھیں، مرتا کون ھے ؟

 

پھر مُجھے فارس محبت دُور دیسوں سے مِلی

مَیں سمجھتا تھا کہ میرے شعر سُنتا کون ھے ؟

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ