اردوئے معلیٰ

Search

 

یا رب ثنا میں کعب کی دلکش ادا ملے

فتنوں کی دوپہر میں سکوں کی ردا ملے

 

حسان کا شکوہِ بیاں مجھ کو ہو عطا

تائیدِ جبرئیل بوقتِ ثنا ملے

 

بوصیریء عظیم کا ہوں میں بھی مقتدی

بیماری ءالم سے مجھے بھی شفا ملے

 

جامی کا جذب ، لہجہ قدسی نصیب ہو

سعدی کا صدقہ شعر کو اذنِ بقا ملے

 

آئے قضا شہیدی ء خوش بخت کی طرح

دوری میں بھی حضوریء احمد رضا ملے

 

مجھ کو عطا ہو زورِ بیانِ ظفر علی

محسن کی ندرتوں سے مرا سلسلہ ملے

 

حالی کے درد سے ہو مرا فکر استوار

ادراکِ خاص حضرتِ اقبال کا ملے

 

جو مدحتِ نبی میں رہا بامراد و شاد

اس کاروانِ شوق سے تائب بھی جا ملے

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ