یا محمد جو آپ کا نہ ہوا
واقفِ ذاتِ کبریا نہ وہا
درد بڑھتا رہا دوا نہ ہوا
عشق دل کا جو آئینہ نہ ہوا
ان کا احسان مان دشمن جاں
ہاتھ مصروفِ بد دعا نہ ہوا
کٹ گئے مرحلے سفر کے مگر
طے عقیدت کا مرحلہ نہ ہوا
عمر بھر نعتِ مصطفیٰ لکھی
قرضِ مدحت مگر ادا نہ ہوا
دیکھ کر مسجدِ نبی کا جلال
نعت لکھنے کا حوصلہ نہ ہوا
ہاں وہی حرف ٹھہرا بے وقعت
وقفِ تعریفِ مصطفیٰ نہ ہوا
حیف ہے اس کی بادشاہی پر
تیرے کوچے کا جو گدا نہ ہوا
عجز لفظوں کے منہ سے بول پڑا
نعتِ احمدِ کا حق ادا نہ ہوا
قافلہ میری فکر کا مظہرؔ
سوئے شہرِ نبی روانہ ہوا
