اردوئے معلیٰ

Search

یہ جو اب التفات ہے اے دل

کوئی تو خاص بات ہے اے دل

 

مدحِ سرکار میں لگے رہنا

اِس میں تیری نجات ہے اے دل

 

رُخ دکھا دیں تو دن نکل آئے

زلف کھولیں تو رات ہے اے دل

 

اُن کی یادیں سکون دیتی ہیں

دن ہے اجلا کہ رات ہے اے دل

 

اُلفتِ مصطفٰے سنبھال کے رکھ

’’یہ مری کائنات ہے اے دل‘‘

 

وہ ملیں تو خُدا بھی ملتا ہے

مُصطفٰے ہی وہ ذات ہے اے دل

 

ہے یہی تو جلیل کی دولت

مصطفیٰ کی جو نعت ہے اے دل

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ