آپ کو اچھا لگا ہے ؟ بے تحاشا کیجئے
آپ میری ذات کا جتنا تماشہ کیجئے
کب تلک روئیں گے میت رکھ کے اپنے سامنے
بس سپرد خاک ان خوابوں کا لاشہ کیجئے
آپ کی اس بے حسی نے مار ڈالا ہے مجھے
بیٹھ کر اب میرے جیسے بت تراشا کیجئے
فرق پڑنا ہی نہیں ہے آپ کی فطرت سے اب
پل میں تولہ کیجئے یا پل میں ماشہ کیجئے
میٹھے پن میں زہر کا عنصر دکھائی دے چکا
چاہے اپنی ذات کو صاحب ! بتاشہ کیجئے
دل کے آتش دان کا بجھنا ہمیں منظور ہے
راکھ سے چنگاریاں اب مت تلاشا کیجئے