اردوئے معلیٰ

Search

 

ابھی تو خواب ہی دیکھا ہے شہرِ طیبہ کا​

ابھی سے حال دگرگوں ہے چشمِ بینا کا​

 

مِری نظر میں ہے تنویرِ منزلِ مقصود​

چراغِ راہِ یقیں ہے خیال آقا کا​

 

رہِ حجاز کے ذروں میں جذب ہو جاؤں​

علاج ہے یہ مِرے دردِ بے مداوا کا​

 

نبی کے ہجر میں رونا بھی عینِ راحت ہے​

” مِری نگاہ میں ہے جمع و خرج دریا کا "​

 

دعا قبول ہوئی آپ کے وسیلے سے​

شعور آپ نے بخشا ہمیں تمنا کا​

 

کہاں اسیرِ ہوا اور کہاں ثنائے رسول​

حباب خاک احاطہ کرے گا دریا کا​

 

خیالِ شافعِ محشر محیطِ جاں ہے ایاز​

نہیں ہے تشنہء تعبیر خواب فردا کا​

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ