اردوئے معلیٰ

Search

اذنِ نیازِ مدحتِ سلطانِ خیر تام

کشتِ طلب پہ جیسے ہو بارانِ خیرِ تام

 

مجھ سا گناہ گار بھی ہے مستفادِ عفو

کتنا وسیع ہے ترا دامانِ خیرِ تام

 

خود ہی ، میانِ حشر ، نگہ دارِ جاں ہُوا

اِک مُر خطر کو ڈھونڈتا ، فیضانِ خیرِ تام

 

کافی ہے عرضِ خام کو شانِ خیارِ کُل

شافی ہے عجز تام کو پیمانِ خیرِ تام

 

لے کر چلا ہُوں ساتھ ثنا ہائے شاہِ دیں

بخشش کے واسطے ہے یہ سامانِ خیرِ تام

 

واللہ اُن کی مرضی پہ ہے انحصارِ لطف

واللہ اُن کا اذن ہی ہے جانِ خیرِ تام

 

اذنِ ثنا رہے مری سانسوں کے ساتھ ساتھ

پیہم کرم ہو صدقۂ حسانِ خیرِ تام

 

جس کی عطا سے سلسلۂ خیر ہے رواں

بندہ نواز ! آپ کا ہے خوانِ خیرِ تام

 

پیہم رواں دواں ہے ترے لطف کی سبیل

ہے عام چار سُو ترا احسانِ خیرِ تام

 

صدقہ ہے شہرِ حُسن کا تزئینِ زندگی

بخشش ہے کوئے ناز کی ایقانِ خیرِ تام

 

مقصودؔ ہم بھی پائیں گے خیراتِ مغفرت

فرمائیں گے وہ حشر میں اعلانِ خیرِ تام

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ