اردوئے معلیٰ

Search

اَلسَّلام ! اے بنتِ ابنِ بو قحافہ اَلسَّلام

اَلسَّلام ! اے عائشہ ! اے مادرِ عالی مقام

 

گاہے گاہے یک نظر بر من اے امّ المومنیں

میں غلام ابنِ غلام ابنِ غلام ابنِ غلام

 

اَلسَّلام ! اے طاہرہ ، اے طیّبہ ، اے زاہدہ

اَلسَّلام ! اے عابدہ ، اے عائشہ ذی احترام

 

اَلسَّلام اے محسنہِ دینِ محبوبِ خدا

آپ سے مَروی حدیثوں پر کھڑا دیں کا نظام

 

عائشہ کی نسبتیں ہیں خلق میں اعلیٰ تریں

دُخترِ صدّیقِ اکبر ، زوجہِ خیر الانام

 

یوں تو عالی مرتبت ہیں ساری ازواجِ نبی

عائشہ کا ہے مگر سب سے جداگانہ مقام

 

سوچئے تو کس قدر ذی مرتبہ ہیں عائشہ

جن کو جبریلِ امیں بھی پیش کرتے تھے سلام

 

افضل الخلق آپ کے والد ہیں بعد الانبیاء

آپ کے سرتاج ٹھہرے سارے نبیوں کے امام

 

آپ ہیں محبوبہِ محبوبِ ربِّ ذوالجلال

آپ پر سایہ فگن رحمت خدا کی ہے مدام

 

عائشہ کے ذکر کو تب تک نہ آئے گا زوال

دہر میں حاصل ہے جب تک ذکرِ احمد کو دوام

 

عائشہ کی حرمت و پاکیزگی کی اِفک میں

آپ قرآں میں گواہی دیتا ہے ربِّ انام

 

منکرینِ عائشہ ! لو ہوش کے ناخن ذرا

کس کے حجرے میں ہے دیکھو سرورِ دیں کا قیام

 

عائشہ کے مرتبے کے منکرو ! دیکھو ذرا

ہے کہاں تا حشر سرکارِ دو عالم کا قیام

 

اے سکونِ قلبِ محبوبِ الٰہُ العالمیں

پھینک دوں قدموں سے تیرے وار کر عالم تمام

 

از طفیلِ مصطفےٰ بر حال زارِ ما بہ کن

یک نگاہِ مہرباں اے مادرِ عالی مقام

 

یک نگاہِ لطف کن بر حالِ ما یا عائشہ

دست بستہ ہیں کھڑے حاضر ترے سارے غلام

 

تُو کہ بانُوئے پیمبر من کہ ادنیٰ امّتی

کن کرم اے مادرِ صد مہرباں بر من تمام

 

از طفیلِ مصطفےٰ ، خیر الوریٰ ، صلِّ علیٰ

کر قبول اے مادرِ من ! اپنے دانش کا سلام

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ