اردوئے معلیٰ

Search

اگر سارا زمانہ حاملِ عشقِ خدا ہوتا​

تو ہر لب پر محمد مصطفےٰ صلِّ علےٰ ہوتا​

​ 

یہ مہر و مہ نہ یہ ہنگامہء صبح و مسا ہوتا​

نہ آتے آپ تو اک ہو کا عالم جابجا ہوتا​

​ 

اگر وہ نام جاں پرورلبِ دل سے ادا ہوتا​

تو اے بیمارِ غم تو کب کا اچھا ہوگیا ہوتا​

 

خیالِ صاحبِ لوح و قلم کا فیض ہے ورنہ ​

نہ آنکھیں باوضو ہوتیں نہ دل محوِ ثنا ہوتا​

​ 

دلِ سوزاں میں ٹھنڈک پڑ گئی بارانِ رحمت سے​

عنایت وہ نہ فرماتے تو اپنا حال کیا ہوتا ​

​ 

غمِ سرکار نے اک اک قدم پر رہنمائی کی ​

میں اس ہنگامہء عیش و طرب میں کھوگیا ہوتا​

​ 

ہواؤ !جانبِ طیبہ مجھے بھی ساتھ لے جاؤ​

خدارا یہ نہ کہہ دینا کہ "پہلے سے کہا ہوتا "​

 

دمِ آخر اگر آقا نہ دل پر ہاتھ رکھ دیتے ​

تو پھر صدیوں میں طے یہ اک نفس کا فاصلہ ہوتا​

​ 

شبیہِہ شافعِ محشر سجی تھی شیشہء دل میں​

ایاز ایسے میں کیا اندیشہء روزِ جزا ہوتا ​

​ 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ