اردوئے معلیٰ

Search

 

بُلا لو پھر ہمیں شاہِ عرب مدینے میں

تمہی کو تم سے کریں گے طلب مدینے میں

 

درِ حضور پہ جا کر ہے مانگنا اعزاز

بغیر مانگے ملا ورنہ سب مدینے میں

 

زمیں پہ اشک نہ گرنے دیے فرشتوں نے

میں اشکبار ہوا جا کے جب مدینے میں

 

یہ پوچھنا ہے مدینے کے زائرو! جا کر

مجھے حضور بلائیں گے کب مدینے میں

 

ادب سے رہنا مدینے میں اے دلِ مضطر

سگانِ در کا ہے واجب ادب مدینے میں

 

نگاہ و دل سے ترے بام و در کو بوسے دوں

کروں نہ دوسرا کوئی کسب مدینے میں

 

ہو کیوں نہ نور کی بارش ہر اک سمے اشفاقؔ

کہ جلوہ ساماں ہیں محبوبِ ربّ مدینے میں

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ