اردوئے معلیٰ

Search

خلق کے سرور شافع محشر صلی اللہ علیہ وسلم

مُرسَلِ داور خاص پیمبر صلی اللہ علیہ وسلم

 

نورِ مجسم نیّرِ اعظم سرورِ عالم مونسِ آدم

نوح کے ہمدم خضر کے رہبر صلی اللہ علیہ وسلم

 

فخر جہاں ہیں عرش مکاں ہیں شاہ شہاں ہیں سیف زباں ہیں

سب پہ عیاں ہیں آپ کے جوہر صلی اللہ علیہ وسلم

 

بحرِ سخاوت کانِ مروّت آیۂ رحمت شافع امّت

مالکِ جنّت قاسمِ کوثر صلی اللہ علیہ وسلم

 

دولتِ دنیا خاک برابر ہاتھ کے خالی دل کے تونگر

مالکِ کِشور تخت نہ اَفسر صلی اللہ علیہ وسلم

 

رہبرِ موسیٰ ہادیٔ عیسیٰ تارکِ دنیا مالکِ عقبیٰ

ہاتھ کا تکیہ خاک کا بستر صلی اللہ علیہ وسلم

 

مہرسے مملو ریشہ ریشہ نعت امیرؔ ہے اپنا پیشہ

ورد ہمیشہ دن بھر شب بھر صلی اللہ علیہ وسلم

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ