دشتِ سخن کو خلد بہ داماں بنائیے
یعنی گلِ عرب کا ثنا خواں بنائیے
دل کو حریمِ جلوۂ جاناں بنائیے
کاسے کو رشکِ تختِ سلیماں بنائیے
حجرات ، والضحٰی و الف لام دیکھ کر
’’نعت رسول پاک کا عنواں بنائیے‘‘
صورت ثنائے شہ کے احاطہ کی ہے یہی
گفتہ کو مثلِ گفتۂِ یزداں بنائیے
رکھیے حضور چشم عنایات خاص میں
چاہے گدا کو ساکنِ ملتان بنائیے
لکھ کر ثنائے گوہرِ دندانِ مصطفیٰ
ہر گوشۂ ورق کو دُر افشاں بنائیے
دے کر لعاب کیجیے شیریں بیاں حضور
لقمہ کِھلا کے مجھ کو بھی لقماں بنائیے
آئے خیال میں نہ معظم کے حسنِ غیر
اپنا یوں شاہِ زہرہ جمالاں بنائیے
