لے کر کرم رسولوں کے سردار آ گئے
اس کارواں کے کارواں سالار آ گئے
اللہ کی عطا ہوئی سرکار آ گئے
حاصل کلام محرمِ اسرار آ گئے
ہر لمحے کی دعا ہے الٰہی کرم کرم
مسرور دل ہوا کہ مددگار آ گئے
دو عالموں کو آگہی سرکار سے ملی
ہادی ہمارے مالکِ کردار آ گئے
درد و الم سے ہم کو رہائی عطا ہوئی
درماں دکھوں کے اور کرم کار آ گئے
سارا کلام اللہ کا مدحِ رسول ہے
لاکھوں سلام اللہ کے دلدار آ گئے
محور سکوں کا اسمِ محمد ہے لا کلام
اسلام کے وہ واہ علمدار آ گئے