اردوئے معلیٰ

Search

مدینہ جا کے دیکھیئے کہ ہیں جہاں تجلّیاں

خدا کے فضل سے حضور کی عیاں تجلّیاں

 

قرارِ فکر اور سکون قلب و جاں تجلّیاں

بنور مصطفی ہیں اپنی پاسباں تجلّیاں

 

نفس نفس میں بوئے گل رچی ہوئی بسی ہوئی

ہر ایک سو نبی کی ہیں تجلّیاں تجلّیاں

 

خدا کے ساتھ آپ کا بھی ذکر ہے زبان پر

ہمارے آس پاس ہیں یہاں وہاں تجلّیاں

 

کرم سے آپ کے نہ کیوں فضا ئے سرخوشی ملے

حریمِ ناز میں ہیں جب رواں دواں تجلّیاں

 

یقیں نہ آئے تو چلو دکھاؤں ہر نماز میں

نبوّت رسول کی ہیں ترجماں تجلّیاں

 

گناہگار ناظر جہانِ رائگاں ہوں میں

حضور سر پہ بن گئی ہیں سائباں تجلّیاں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ