نثار ہونے کو دل پر نصیب رہتا ہے
کہ اس جگہ پہ خدا کا حبیب رہتا ہے
ہے شاعروں کی تمنا کہ شعرِ مدحت ہو
تلاشِ نثرِ نبی میں ادیب رہتا ہے
حضور اذنِ مدینہ ملے کرم کیجیے
حضور سندھ میں بھی اک غریب رہتا ہے
ملے جو زائرِ طیبہ تو حاضری کے لیے
جو حالِ دل ہے بہت ہی عجیب رہتا ہے
تمام جن و ملک انس و جاں بنے عشاق
غریقِ حبِ نبی ہر رقیب رہتا ہے
مریض عشق مدینے چلو شِفا کے لیے
وہاں پہ ٹوٹے دلوں کا طبیب رہتا ہے
سلام تجھ پہ اے دربانِ روضہ ءِ اطہر
تو جالیوں کے بہت ہی قریب رہتا ہے