اردوئے معلیٰ

Search

نیا سلسلہ آئے دن امتحاں کا

ہے دستورِ پارینہ بزمِ جہاں کا

 

کرے سامنا پھر اس ابرو کماں کا

یہ دیدہ تو دیکھیں دلِ نیم جاں کا

 

کبھی تو وہ ہو گا جفاؤں سے تائب

ہے اک واہمہ میرے حسنِ گماں کا

 

سرشکِ مژہ سے کب اندازۂ غم

کسے حال معلوم سوزِ نہاں کا

 

زمیں دوز ہو کر رہی برقِ سوزاں

پڑا صبر آخر مرے گلستاں کا

 

نہ مہکے ہیں گل ہی نہ چہکے عنادل

گماں ہے بہاروں پہ دورِ خزاں کا

 

سنا غم کے ماروں کا قصہ کبھی جب

لگا مجھ کو ٹکڑا مری داستاں کا

 

جو خود کٹ گیا رہبرِ کارواں سے

خدا ہی محافظ ہے اس کارواں کا

 

نہ پورا ہو ہرگز نظرؔ زندگی بھر

خسارہ کہ ہے لحظۂ رائیگاں کا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ