اردوئے معلیٰ

Search

کیجے تو ذرا مدحتِ سلطانِ مدینہ

پھر دیکھیے خود رحمتِ سلطانِ مدینہ

 

الفت ہے تو بس الفتِ سلطانِ مدینہ

نسبت ہے تو بس نسبتِ سلطانِ مدینہ

 

امّت پہ نظر ہو کہ گرفتارِ ستم ہے

اک چشمِ کرم ، رحمتِ سلطانِ مدینہ

 

پھر اور بھلا کون جچے اس کی نگہ میں

جس دل میں بسے عظمتِ سلطانِ مدینہ

 

جز اس کے تمنّا نہیں اب کوئی بھی یا رب

دکھلا دے مجھے صورتِ سلطانِ مدینہ

 

خورشید پلٹ آتا ہے ، ہوتا ہے قمر شق

دیکھو تو ذرا قدرتِ سلطانِ مدینہ

 

عاصی پہ کرم ہو کہ گرفتارِ بلا ہے

اے رحمتِ حق ، رحمتِ سلطانِ مدینہ

 

اللہ کے بعد ان سے نہیں کوئی بھی بڑھ کر

دیکھے تو کوئی رفعتِ سلطانِ مدینہ

 

ماں باپ فدا میرے ، دل و جان تصدّق

"اے طلعتِ حق ، طلعتِ سلطانِ مدینہ”

 

اس دل کو کوئی صاحبِ دل کیسے کہے دل

جس دل میں نہ ہو عظمتِ سلطانِ مدینہ

 

پڑھتے ہوئے نعت ان کی میں قدموں میں گروں گا

دیکھوں گا میں جب صورتِ سلطانِ مدینہ

 

توحید کا دعویٰ بھی غلط اس کا ہے دانش

جس دل میں نہیں حرمتِ سلطانِ مدینہ

 

دانش ! مجھے محشر کا کوئی خوف نہیں ہے

حامی ہیں مرے حضرتِ سلطانِ مدینہ

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ