اردوئے معلیٰ

Search

کیہ سی جے توں آ جاندوں اج نال بہاراں دے

دل ویہڑیوں مُک جاندے پھر کال بہاراں دے

 

تینوں اے پتہ سارا کیہ حال بہاراں دے

مڑ حال اجے کیوں نیں بے حال بہاراں دے

 

محبوب دیاں یاداں کر قید لیا مینوں

شالا نہ کدی ٹٹن ہُن جال بہاراں دے

 

دلدار توں دکھ کر دے ایناں تے عطا مینوں

موڑاں نہ کدی خالی میں تھال بہاراں دے

 

سرکار ، کرم کر دے رو رو کے خزاں کہندی

اس ویکھ لئے کھلرے اج وال بہاراں دے

 

اُس در دی فضا کہندی چپ کر کے اراں آجا

تھاں تھاں توں کھُرے ایویں نہ بھال بہاراں دے

 

اعجازؔ نظر تیری کجھ مینوں جے کر دیندی

آ جاندا گلی تیری میں نال بہاراں دے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ