اردوئے معلیٰ

Search

ہجر کے روح فرسا یہ لمحات ہیں، جاں پریشاں ہے، اشکوں کی برسات ہے

باریابی کی مجھ کو اجازت ملے دل میں کب سے اُمیدِ ملاقات ہے

 

تشنگی تشنگی، تیرگی تیرگی، العطش العطش، روشنی روشنی

اپنے بندے پہ چشمِ کرم سیدّی، سر پہ ظلماتِ غم کی سیہ رات ہے

 

کون ہے جو یتیموں کا ہے آسرا، کون ہے جو ہے مفلس کا حاجت روا

کون ہے جس پر اِتراتے ہیں بے نوا، رحمتِ دو جہاں وہ تری ذات ہے

 

تُو رسولوں کی صف میں سرافراز سر، و ہ ستارے ہیں سب ان میں تُو ہے قمر

’’یوں تو سب انبیاء محترم ہیں مگر، سرورِ انبیاء تیری کیا بات ہے‘‘

 

تیرا مدحت سرا خود خدائے زمن تیری تعریف ہے انجمن انجمن

تیری حمد و ثنا میں چمن در چمن، پھول ہے، خار ہے، ڈال ہے، پات ہے

 

انورؔ آیا ہے اس شان سے حشر میں، سامنے جلوۂ چہرۂ مصطفی!

چشم پُرنم ہے جاں عالمِ وجد میں، لب پہ نعتِ محمد کی سوغات ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ