شیشۂ دل میں اے عکسِ گنبدِ اخضر اتر

جذب کے امکان میں لا اب کوئی موجِ طرب

خواب کے احساس میں اے منظرِ دلبر اُتر

اُن کو آنا ہے نئے لمحوں کی آرائش کے ساتھ

میرے آنگن میں سحَر اب صورتِ دیگر اُتر

سوچ بے خود، سَر نہفتہ، حرفِ مدحت منفعل

نقشِ نعلینِ کرم تُو جادۂ دل پر اُتر

قاسمِ جنت کے ہاتھوں میں ہے بخشش کا بھرم

دیر ہے کس بات کی اے تلخئ محشر اُتر

یہ تعطل خیز لمحے درپئے آزار ہیں

نامہ بر کف موجۂ بادِ صبا ! اکثر اُتر

وہ تو ہر اوجِ سخن کی وسعتوں سے ہیں پرے

اے مرے جذبِ دروں ! اب شعر سے باہر اُتر

فاصلے سے ٹُوٹ جاتا ہے تسلسل کا خمار

منظرِ دیدِ مسلسل آنکھ میں آ کر اُتر

مَیں اُسے پھر جوڑ لوں گا نعت کی تدبیر میں

آ کوئی حرفِ طلب ! جبریل کے پَر پر اُتر

اِس زمینِ شعر میں مشکل ہے مدحت کی نمو

حرف کی پاپوش پر اے دیدۂ اختر اُتر

صبح میں باندھوں گا تجھ کو مقطعِ نعتِ نبی

روشنی کے مطلعِ اظہار پر شب بھر اُتر

حاصلِ نظمِ دو عالم، جلوۂ مقصودِ کُن

بہرِ تکمیلِ سخن ادراک کے اوپر اُتر