جوازِ رفتہ و آئنہ کل ہے ذکرِ نبی

گرے ہُوؤں کو اُٹھائے حضور کی نسبت

دمِ فتادگی کیا بر محَل ہے ذکرِ نبی

خدا کا شکر ، نہیں اور کچھ لبوں پہ مرے

مری زبان پہ وقتِ اجَل ہے ذکرِ نبی

سخن وبال ہے اور نعت ہے نویدِ سکوں

سکوت کرب ہے اور اس کا حل ہے ذکرِ نبی

قرارِ خاطرِ مضطَر ہے ایک اسم کا ورد

علاجِ تلخئ جملہ عِلَل ہے ذکرِ نبی

جمالِ مقطع بعدِ ابد ہے اسمِ حضور

فروغِ مطلعِ قبلِ ازل ہے ذکرِ نبی

میانِ روح مہکتی ہے اُس کی گُل ریزی

کرم خصال ، معطر عمَل ہے ذکرِ نبی

عطا شعارِ مسلسل ہے اُس کا لطفِ دروں

سکونِ دل کے لیے بے بدَل ہے ، ذکرِ نبی

ہے شاخ شاخ پہ مقصودؔ حرف حرف کا رَس

شجر حیات کا پرتَو ہے ، پَھل ہے ذکرِ نبی