ہر عبادت سے درود آپ کا اعلیٰ افضل

آپ کے اسم سے ہیں لفظِ جہاں میں معنی

ورنہ یہ دفترِ صد رنگ و نمو بس مہمل

شفقتیں آپ کی ہر گوشۂ گیتی پہ محیط

رحمتیں آپ کی دنیا پہ برستا بادل

آپ کی دین سے دنیا کی شرف کو منزل

ظلمتِ دہر میں ہیں آپ ہی حق کی مشعل

آپ یکتائے زمانہ ہیں وہ سلطاں جس کا

کوئی نقارہ ، نہ دربار ، نہ قلعہ ، نہ محل

آپ کی بات بشر کے لیے اسمِ اعظم

وجہِ تقلیدِ جہاں آپ کا ہر ایک عمل

یوں تو ہم سب کے لیے آپ ردائے رحمت

نسب و مِلک کا عورت پہ جو ڈالا آنچل

آپ کے فرق پہ قرباں یہ گلِ جانِ عزیز

آپ کے پاؤں کے نیچے مری آںکھوں کے کنول

آرزو ہے کہ یہ بڑھ کر بڑا چھتنار بنے

آپ کے پیار کی پھوٹی ہے جو دل میں کونپل

اک عنایت کی نظر مجھ پہ بھی آقائے جہاں

اک اشارہ مری بخشش کا بھی مولائے مِلل

اک جھلک روئے مبارک کی بھی ارزانی ہو

زندگانی مری بے برگ ہے ہو جائے سپھل

میں منجلۂ اجرامِ محبت ہو جاؤں

آفتابِ افقِ خیر ، مجھے بھی اک پل

اک تمنا ہے کہ بس اتنی سعادت مل جائے

روضۂ پاک پہ روتا ہوں کہ آ جائے اجل