تری رحمت ہی ہے اپنا سہارا یا رسول اللّٰہ

ہوائیں پھر مخالف ہیں ہمارے پاک پرچم کی

کبھی نیچا نہ ہو پرچم ہمارا یا رسول اللّٰہ

تلاطم خیز موجوں میں گھرا اپنا سفینہ ہے

کرم فرمائیں مل جائے کنارا یا رسول اللّٰہ

برے بھی ہیں بھلے بھی ہیں مگر ہیں تو شہا تیرے

تجھی کو ہی تو مشکل میں پکارا یا رسول اللّٰہ

شہیدوں کی یہ دھرتی ہے وطن ہے سرفروشوں کا

تری نسبت نے ہر ذرّہ سنوارا یا رسول اللّٰہ

ترے دیں کی حفاظت کے لیے جانیں لٹا دیں گے

یہی ہے عزم اور وعدہ ہمارا یا رسول اللّٰہ

شجاعت استقامت میں ، بسالت اور ہمّت میں

دکھا دیں پھر ذرا بدری نظارا یا رسول اللّٰہ

عطا ہو زورِ حیدر بھی ہمیں نانِ جویں میں پھر

نہیں تیرے سوا کوئی سہارا یا رسول اللّٰہ

بنامِ سیّدہ زہرا غلاموں کی خبر لیجے

کرم کی اک نظر کیجے خدا را یا رسول اللّٰہ

ترے حسنین کا نوکر ظفر بھی حاضرِ در ہے

لیے فریاد ہونٹوں پر بیچارا یا رسول اللّٰہ