ہادیٔ اعظم سن لیجے رہتا ہوں میں ہر دم ناشاد

مجھ کو ہے طیبہ کا ارماں رہتا ہوں میں دن رات تپاں

میرے مکرم سن لیجے زندگی ہے میری برباد

کوئی نہیں میرا غم خوار کر دیا غم نے زار و نزار

نوح کے ہمدم سن لیجے رہتی ہے دل کو آپ کی یاد

آپ ہیں رحمت دو عالم کس سے کہوں میں جا کر غم

لطف مجسم سن لیجے آنکھ ہے غمگیں دل ناشاد

آپ ہیں داتا میں ہوں گدا پھیلا ہوا ہے ہاتھ مرا

قائم و دائم سن لیجے دیجئے مجھ کو میری مراد

میری نوائے نیم شبی میرا بیان درد دلی

حق کے محرم سن لیجے اور مجھے کیجے دل شاد

اور ہے حاصل ہر نعمت صرف ہے طیبہ کی حسرت

رحمت عالم سن لیجے تڑپے بھلا کب تک بہزادؔ