​

معجزہ ہے آیہء والنجم کی تفسیر کا ​

ایک ایک نقطہ ستارہ ہے مری تحریر کا ​
​

آپ کی نسبت ہے مجھ کو باعثِ عزّو شرف​

آپ کی مدحت وسیلہ ہے مری توقیر کا ​
​

کس طرح گزریں گے یہ دوری کے روز و شب حضور​

صبح کرنا شام کا لانا ہے جوئے شیر کا​
​

کب مجھے بلوائیں گے آقا حریمِ قدس میں ​

خوابِ ہستی منتظر ہے جلوہء تعبیر کا​
​

آہِ غم دل سے اٹھی اور بابِ رحمت کھل گیا​

میں نے دیکھا ہے یہ منظر آہ کی تاثیر کا​
​

جنتِ خوابِ تمنا ہے مدینے کا خیال ​

شہرِ رنگ و بو علاقہ ہے مری جاگیر کا​
​

خاک ہوکر راہِ طیبہ میں بکھر جاؤں ایاز ​

یہ حسیں رخ ہے مری تخریب میں تعمیر کا​
​