نبی دا جلوہ نماز دل دی گدا کدی کر قضا نئیں سکدا
میں ساہ لینا بھلا تے سکنا بھلا نبی دی ادا نئیں سکدا
ہمیش اکھیاں کریندیاں نیں طواف سوہنے کمال مکھ دا
مجال کیہ اے پلک وی جھمکاں عذاب ایڈا پچا نئیں سکدا
وصال دی بے مثال اگ تے بلال دل دا ایہ نعرہ لاوے
سواہ سڑ کے نہ لبھّے بھاویں خیال وچھڑن دا آ نئیں سکدا
خبیب وانگوں وفا مِری نوں زمانہ سولی ہزار چاہڑے
نبی دے در تے کھلوتی جم کے قدم وفا دے ڈُلا نئیں سکدا
نصیب میرا جے ساتھ دیندا وچھاندا راہ تے میں کہکشاواں
چراغ ہنجواں دے باہجھ آقا غریب راہواں سجا نئیں سکدا
وٹا وٹا کے توں روپ سوہنا فلک تے جتنا وی سج کے آویں
کدی وی طیبہ دی خاک ورگا توں روپ چناں وٹا نئیں سکدا
گلاب اعجازؔ روح میری جناب خشبو گلاب دی نیں
جہان قیمہ کرے چا بھاویں جناب توں کر جدا نئیں سکدا