وا رہتا ہے اُن پر درِ ایوانِ مدینہ
اس اوج پہ فائز ہیں اسیرانِ مدینہ
ہے خُلد بھی اک گوشۂ دامانِ مدینہ
کس درجہ ہے وُسعت تری میدانِ مدینہ
تم ایسی امارت کو سمجھ ہی نہیں سکتے
رکھتے ہیں جو گدڑی میں فقیرانِ مدینہ
یک لحظہ بھی لَو ماند نہیں پڑتی یہاں کی
آباد ہی رہتا ہے شبستانِ مدینہ
وہ اور کہیں جانے پہ مائل نہیں ہوتا
جو دیکھ لے اک بار گلستانِ مدینہ
یہ عمر کروں صرف تری نعت گری میں
اے جانِ سخن ، جانِ فدؔا ، جانِ مدینہ
کس طرح اُترتی ہیں فرشتوں کی قطاریں
کس اوج پہ ہے دیکھ فدا شانِ مدینہ