ہو گئے نطق کے پیرایۂ اِظہار تمام
حد سے باہَر ہی رہے آپ کے انوار تمام
ساعتِ رؤیتِ اوّل ہی تھی ایمان نواز
خود ہی اقرار میں ڈھل جاتے تھے انکار تمام
آپ کی نعت ہے تدبیرِ شفائے ُکلی
آپ کے ذِکر سے کھِل اُٹھتے ہیں بیمار تمام
روشنی، رنگ، یہ نعتیں ، یہ درود اور سلام
آپ کے آنے کے ہوتے ہیں یہ آثار تمام
کِس قدر انظف و اطہر ہیں ترے اہلِ بیت
کِس قدر صادق و صابر ہیں ترے یار تمام
آپ کے اِذن پہ موقوف ہے طیبہ کا سفر
در ہی بن جائے گی تقدیر کی دیوار تمام
‘‘آمدِ سیّدِ کونین کا اعلان ہے ’’ ُکن
بہرِ ترحیب ہیں یہ ثابت و سیّار تمام
نور بر دوش ہے یہ سارا نظامِ فلکی
رنگ بردار ہیں یہ آپ سے ُگلزار تمام
سُن کے ُغفران کا مژدہ سَر دربارِ کرم
آ کے بیٹھے ہیں ترے در پہ گنہگار تمام
آپ کا درد ہی چھایا رہا تا حدِّ طلب
آنے کو آتے رہے ناصح و غمخوار تمام
جاں دمیدہ ہیں ترے نامِ کرم کے وارث
سر خمیدہ ہیں ترے سامنے سردار تمام
شامِ احساس کو چھو جائے تری یاد کا لمس
صبحِ توفیق کو ملتا رہے دیدار تمام
مزرعِ دل پہ ہے مقصودؔ بہاروں کا نزول
پھول بن بن کے کھِلے جاتے ہیں اشعار تمام