مژدۂ عفوِ نہایت ہے خطا کار کے پاس

حیطۂ جاں میں رواں ہے یمِ تمدیح کی رَو

تشنگی پھر بھی کہیں رہتی ہے اظہار کے پاس

لَوٹ آیا ہے مدینے سے تنِ جبر نصیب

دل بصد عجز وہیں ہے درِ غمخوار کے پاس

موجۂ بادِ شفاعت مرے امکان میں اُترا

فردِ عصیاں ہے مری ، نگہ دار کے پاس

بامِ تعبیر پہ رخشاں ہے ترے خواب کا لمس

قدِ احساس سے بالا ، حدِ آثار کے پاس

وہ جو چاہیں تو شَرف یابِ زیارت کر دیں

بس تمنا کی ریاضت ہے طلب گار کے پاس

دستِ اجبارِ اجل پردۂ رخصت نہ گرا

ساعتِ دید ہے باقی ابھی بیمار کے پاس

خامۂ عجز کو حاصل ہے ترے اسم کا ناز

مدحتِ نَو کا تفاخُر ہے نگوں سار کے پاس

بے اماں فردِ غلط کار ہے رنجُورِ الم

اور مداوا ہے اُسی دستِ شفا بار کے پاس

بخت یاور ہو تو رہ جاؤں مدینے میں کہیں

صورتِ گرد ، پریشاں در و دیوار کے پاس

مجھ پہ ہو جائے جو مقصودؔ عنایت کی نظر

جی اُٹھے ساعتِ بے دَم شبِ دیدار کے پاس